ഫേസ്ബുക്കിൽ പോസ്റ്റ് പങ്കുവെയ്ക്കുന്നത് ആർക്കെങ്കിലും ഒരാൾക്ക് കൊള്ളാൻ വേണ്ടിയാണെന്ന് വിനായകൻ. ആളുകൾ വിട്ടുകളയുന്ന കാര്യങ്ങളാണ് താൻ പങ്കുവെയ്ക്കുന്നതെന്നും തന്നെ ഫോളോ ചെയ്യുന്നവരിൽ ആർക്കെങ്കിലും കൊള്ളാൻ വേണ്ടിയാണ് പോസ്റ്റ് ഇടുന്നതെന്നും കൊണ്ട് കഴിഞ്ഞാൽ പോസ്റ്റ് ഡിലീറ്റ് ചെയ്യുമെന്നും വിനായകൻ പറഞ്ഞു. വിമർശനമാണ് ഞാൻ നടത്തുന്നത് അത് ഏറ്റെടുത്ത് കഴിഞ്ഞാൽ പോസ്റ്റ് ഡിലീറ്റ് ചെയ്യുമെന്നും ഒരുത്തി എന്ന സിനിമയുടെ പ്രമോഷന്റെ ഭാഗമായി മാധ്യമങ്ങളോട് സംസാരിക്കവെ വിനായകൻ പറഞ്ഞു.
അതേസമയം മീടു എന്നതിന്റെ അർഥം അറിയില്ലെന്നും ഒരു സ്ത്രീയുമായി ശാരീരിക ബന്ധത്തിൽ ഏർപ്പെടാൻ തോന്നിയാൽ ചോദിക്കുമെന്നും അതിനെ മീടു എന്നാണ് വിളിക്കുന്നതെങ്കിൽ ഇനിയും താൻ ചോദിക്കുമെന്നും വിനായകൻ പറഞ്ഞു. തന്റെ ജീവിതത്തിൽ പത്ത് സ്ത്രീകളുമായി ശാരീരിക ബന്ധത്തിൽ ഏർപ്പെട്ടിട്ടുണ്ട് അവരോടെല്ലാം എന്നോടൊപ്പം ഫിസിക്കൽ റിലേഷനിൽ ഏർപ്പെടുമോ എന്ന് താനാണ് ചോദിച്ചതെന്നും വിനായകൻ പറഞ്ഞു.
ഫാൻസിനെ നിരോധിക്കണമെന്നും, ഫാൻസുകാർ മണ്ടന്മാരാണെന്നും വിനായകൻ പറഞ്ഞു. അവർ വിചാരിച്ചാലൊന്നും ഒരു സിനിമയും നന്നാകാനോ ചീത്തയാകാനോ പോകുന്നില്ലെന്നും ഈ അടുത്ത കാലത്ത് ഒരു മഹാനടന്റെ സിനിമ ഇറങ്ങിയെന്നും പന്ത്രണ്ട് മണിക്ക് ഇറങ്ങിയ പടത്തിന്റെ ഇന്റർവെൽ സമയത്ത് ഒരാൾ ഇറങ്ങി ഓടിയെന്നും പടം കാണാൻ ഒരു പൊട്ടന്മാരും ഉണ്ടായില്ലെന്നും വിനായകൻ പറഞ്ഞു.