ഭാര്യയ്ക്ക് ഡോക്ടറേറ്റ്, മകൾക്ക് ഫുൾ എ പ്ലസ്, ഇരട്ടിമധുരം പങ്കുവെച്ച് എം ബി രാജേഷ്

ത്രിശൂർ: സിപിഎം നേതാവും മുൻ എംപിയുമായിരുന്ന എം ബി രാജേഷിന് ഇരട്ടി മധുരമാണ് ലഭിച്ചിരിക്കുന്നത്. ഭാര്യക്ക് ഡോക്ടറേറ്റ് ലഭിക്കുകയും മകൾക്ക് എല്ലാ വിഷയത്തിലും എ പ്ലസ് ലഭിക്കുകയും ചെയ്തതിന്റെ സന്തോഷം അദ്ദേഹം ഫേസ്ബുക്കിലൂടെ പ്രകടിപ്പിച്ചിരിക്കുകയാണ്. പാലക്കാട് പി എം ജി ഗവൺമെന്റ് ഹയർ സെക്കൻഡറി സ്കൂളിൽ പഠിച്ച മകൾ എസ്എഫ്ഐയുടെ പ്രവർത്തകയും സ്കൂൾ ലീഡറുമാണ്. അതിനിടയിൽ പഠനത്തിൽ മികവ് പുലർത്തുകയും മികച്ച മാർക്കോട് കൂടി വിജയിക്കുകയും ചെയ്തു. കൂടാതെ ഭാര്യ നിനിതയ്ക്ക് ഡോക്ടറേറ്റ് ലഭിച്ചത് അടുത്ത കാലത്തുണ്ടായ ഏറ്റവും വലിയൊരു സന്തോഷമാണെന്നും അദ്ദേഹം പറയുന്നു. അധ്യാപക ജോലിയുടെയും വീട്ടു ജോലിയുടെയും മറ്റും പ്രാരാബ്ദങ്ങൾക്കിടയിൽ കഠിനമായ പ്രയത്നം നടത്തിയാണ് ഭാര്യ ഡോക്ടറേറ്റ് നേടിയതെന്ന് അദ്ദേഹം തന്റെ ഫേസ്ബുക്ക് കുറിപ്പിലൂടെ പറയുന്നു. ഫെയ്സ്ബുക്ക് കുറുപ്പിന്റെ പൂർണരൂപം വായിക്കാം…

വളരെ വ്യക്തിപരമായ ഒരു സന്തോഷം നിങ്ങളുമായി പങ്കിടുകയാണ്. മൂത്ത മകൾ നിരഞ്ജനക്ക് എസ്.എസ്.എൽ.സി പരീക്ഷയിൽ എല്ലാ വിഷയത്തിനും ഏ പ്ലസ് ലഭിച്ചതാണത്. എല്ലാ വിഷയത്തിനും ഏ പ്ലസ് എന്നത് ഒരു മഹാകാര്യമായിട്ടൊന്നും ഒരിക്കലും തോന്നിയിട്ടില്ല. പരീക്ഷ, മാർക്ക് ,ഗ്രേഡ് എന്നീ അളവുകോലുകളുടെ പരിമിതികളെക്കുറിച്ചും ബോദ്ധ്യമുണ്ട്. അപ്പോഴും നിരഞ്ജനക്ക് ഇത് പകരുന്ന ആഹ്ലാദവും ആത്മവിശ്വാസവും ചെറുതല്ല എന്ന് തിരിച്ചറിയുന്നു.പാലക്കാട് പി.എം.ജി ഗവ.ഹയർ സെക്കൻ്ററി സ്കൂളിലാണ് അവൾ പഠിച്ചത്.എസ്.എഫ്.ഐ.യുടെ പ്രവർത്തകയും സ്കൂൾ ലീഡറുമാണ്. അതിനിടയിലും പഠനത്തിൽ മികവ് പുലർത്തിയതിൽ പഴയ SFI പ്രവർത്തകരായ എനിക്കും നിനി തക്കും പ്രത്യേക സന്തോഷമുണ്ട്.

അടുത്ത കാലത്തുണ്ടായ മറ്റൊരു സന്തോഷം നിനിതക്ക് ഡോക്ടറേറ്റ് ലഭിച്ചതാണ്. അദ്ധ്യാപക ജോലിയുടേയും വീട്ടുജോലിയുടേയും വലിയ പ്രാരാബ്ധങ്ങൾക്കും മക്കളുടെ കാര്യങ്ങളെല്ലാം നോക്കേണ്ടതിനിടയിലുമായി കഠിനമായി പ്രയത്നിച്ചാണ് നിനിത ഗവേഷണം പുർത്തിയാക്കിയത്. പ്രൊഫ: കെ.പി.അപ്പൻ്റെ രചനകളെ മുൻനിർത്തി മലയാള സാഹിത്യത്തിലെ പ്രത്യയശാസ്ത്ര സമീപനങ്ങളെക്കുറിച്ചായിരുന്നു ഗവേഷണം. നിരഞ്ജനയുടെ പoനത്തിലും പ്രധാന വഴികാട്ടി അമ്മ തന്നെ. എൻ്റെ വക പിന്തുണയും അത്യാവശ്യ ഘട്ടത്തിലെ സഹായവും മാത്രം. ഫോട്ടോയിൽ നിരഞ്ജനക്കും നിനിതക്കുമൊപ്പമുള്ളത് ഇളയവൾ പ്രിയദത്ത. മണപ്പുള്ളിക്കാവ് ഗവ.എൽ.പി.സ്കൂളിൽ നാലാം ക്ലാസിലെ പാഠങ്ങൾ അവളിപ്പോൾ വീട്ടിലെ ടി.വിക്ക് മുന്നിലിരുന്ന് ഓൺലൈനായി പഠിക്കുന്നു.

എസ്. എസ്.എൽ.സി.പരീക്ഷയിൽ മികച്ച വിജയം നേടിയ എല്ലാ കുട്ടികൾക്കും അഭിനന്ദനങ്ങൾ. ഒപ്പം ഇന്ത്യയിൽ മറ്റെവിടെയും സാദ്ധ്യമാകാത്ത ,പ്രതികൂല സാഹചര്യത്തിലും കേരളത്തിൽ കുറ്റമറ്റ നിലയിൽ പരീക്ഷ നടത്തി റെക്കോഡ് വേഗത്തിൽ ഫലം പ്രഖ്യാപിച്ച സർക്കാരിൻ്റെ കാര്യക്ഷമതയ്ക്കും അഭിവാദനങ്ങൾ.