കോഴിക്കോട് : ആവിക്കലിൽ മലിനജല പ്ലാന്റിനെതിരെ പ്രതിഷേധം നടത്തിയിരുന്ന സമര പന്തൽ പൊളിച്ച് മാറ്റിയതായി പരാതി. കോർപറേഷൻ ജീവനക്കാർ പോലീസിന്റെ സഹായത്തോടെയാണ് ഇന്ന് പുലർച്ചയോടെ സമരപന്തൽ പൊളിച്ച് നീക്കിയത്. മലിനജല പ്ലാന്റ് പദ്ധതി പ്രദേശത്ത് പ്രതിഷേധക്കാർ സ്ഥാപിച്ച സമരപന്തലാണ് പൊളിച്ച് നീക്കിയത്.
കഴിഞ്ഞ ഒരു വർഷത്തിലേറെയായി പോലീസ് കാവലുള്ള സ്ഥലമാണിതെന്നും പ്രതിഷേധക്കാർ പറയുന്നു. അർജന്റീന മെക്സിക്കോ ഫുഡ്ബോൾ മത്സരം നടക്കുന്ന സമയത്താണ് സമരപന്തൽ പൊളിച്ച് നീക്കിയത്. പ്രതിഷേധക്കാർ വാടകയ്ക്കെടുത്തിരുന്ന സാധന സാമഗ്രികളും കോർപറേഷൻ ജീവനക്കാർ എടുത്ത് കൊണ്ടുപോയതായി പ്രതിഷേധക്കാർ ആരോപിച്ചു.