നിഷാ പുരുഷോത്തമനെ അധിക്ഷേപിച്ച സംഭവം ; ജീവനക്കാരനെതിരെ ദേശാഭിമാനി ചീഫ് എഡിറ്റർ പി രാജീവ്

തിരുവനന്തപുരം: മാധ്യമ പ്രവർത്തകയായ നിഷാ പുരുഷോത്തമനെതിരെ സമൂഹ മാധ്യമത്തിലൂടെ ദേശാഭിമാനി ജീവനക്കാരൻ അധിക്ഷേപിച്ച സംഭവത്തിൽ പ്രതികരണവുമായി പത്രത്തിന്റെ ചീഫ് എഡിറ്റർ പി രാജീവ് രംഗത്ത്. ദേശാഭിമാനി പേജിൽ നിന്ന് അല്ലെങ്കിൽപോലും പത്രവുമായി ബന്ധപ്പെട്ട് പ്രവർത്തിക്കുന്നവരുടെ ഭാഗത്തുനിന്ന് മാത്രമല്ല ആരുടെ ഭാഗത്തുനിന്നും ഇത്തരത്തിലുള്ള പ്രവണതകൾ ഉണ്ടാകാൻ പാടില്ലെന്നും ഇക്കാര്യം സംബന്ധിച്ച് ആ വ്യക്തിയോട് ബന്ധപ്പെട്ടവർ വിശദീകരണം തേടിയിട്ടുണ്ടെന്നും പി രാജീവ് ഫേസ്ബുക്ക് പേജിൽ കുറിച്ചു. കുറുപ്പിന്റെ പൂർണരൂപം വായിക്കാം.

ദേശാഭിമാനിയിൽ സർക്കുലേഷൻ വിഭാഗത്തിൽ താൽക്കാലികാടിസ്ഥാനത്തിൽ ജോലി ചെയ്യുന്നയാളുടെ വ്യക്തിപരമായ ഫേസ് ബുക്ക് അക്കൗണ്ടിൽ നിന്നും മനോരമ ചാനലിലെ മാധ്യമ പ്രവർത്തകയെ വ്യക്തിപരമായി അധിക്ഷേപിക്കുന്ന പോസ്റ്റിട്ടതു ശ്രദ്ധയിൽപ്പെടുകയുണ്ടായി. ഇത്തരം രീതികളോട് ദേശാഭിമാനിക്ക് യോജിപ്പില്ല. ദേശാഭിമാനിയുടെ പേജിൽ നിന്നല്ലെങ്കിൽ പോലും പത്രവുമായി ബന്ധപ്പെട്ട് പ്രവർത്തിക്കുന്നവരുടെ ഭാഗത്തു നിന്നു മാത്രമല്ല ആരിൽ നിന്നും ഇത്തരം പ്രവണതകൾ ഉണ്ടാകാൻ പാടില്ലെന്നതാണ് സമീപനം.

ഇതു സബന്ധിച്ച് ആ വ്യക്തിയോട് വിശദീകരണം ചുമതലപ്പെട്ടവർ ചോദിച്ചിട്ടുണ്ട്. ഇന്നലെ തന്നെ അത് ഡിലിറ്റ് ചെയ്തതായാണ് മനസിലാക്കിയത്. രാഷ്ട്രീയമായ വിമർശനങ്ങളാകാം. വ്യക്തിപരമായ അധിക്ഷേപവും സ്വകാര്യതകളിലേക്കുള്ള നുഴഞ്ഞുകയറ്റവും ആധുനിക സമൂഹത്തിനു യോജിക്കുന്നതല്ല. മോർഫിങ്ങുകളും നിർമ്മിത കഥകളും വഴി പാർടി നേതാക്കളെ മാത്രമല്ല കുടുംബാംഗങ്ങളെ വരെ വ്യക്തിഹത്യ ചെയ്യുന്ന രീതി സാമൂഹ്യ മാധ്യമങ്ങളിലൂടെ എതിരാളികൾ നടത്തുന്നുണ്ടെങ്കിലും ഞങ്ങൾക്ക് അത്തരം രീതികളോട് യോജിപ്പില്ല. വ്യക്തി അധിക്ഷേപ രീതികളെ ഞങ്ങൾ തള്ളിപ്പറയുന്നു.

അഭിപ്രായം രേഖപ്പെടുത്തു