റിയാലിറ്റി ഷോയിൽ നിന്നും പുറത്തായ രജിത്ത് കുമാറിനെതിരെയും അദ്ധേഹത്തെ കോച്ചി എയർപോർട്ടിൽ സ്വീകരിക്കാനെത്തിയ ആരാധകർക്കെതിരെയും രൂക്ഷ വിമർശനവുമായി ഡോക്ടർ ഷിംന അസ്സീസ്. മനുഷ്യർ അധപധിക്കുന്നതിന് ഒരു പരിധി ഉണ്ടെന്നും സ്ത്രീ വിരുദ്ധനായ ഒരാളെ ഇത്രയും അപകടകരമായ സാഹചര്യത്തിൽ സർക്കാർ നിർദേശങ്ങൾ അവഗണിച്ച് സ്വീകരിക്കാൻ കൂട്ടം കൂട്ടിയത് എന്തിന്റെ പേരിലായാലും അംഗീകരിക്കാനാവില്ലെന്ന് ഷിംന പറയുന്നു തന്റെ ഫേസ്‌ബുക്ക് പോസ്റ്റിലൂടെയാണ് ഡോക്ടർ ഇത് വ്യക്തമാക്കിയത്. ഡോക്ടറുടെ കുറിപ്പ് ഇങ്ങനെ :
മനുഷ്യർക്ക്‌ അധ:പതിക്കാവുന്നതിന്‌ ഒരറ്റമുണ്ട്‌. ലോകമെങ്ങുമുള്ള ആരോഗ്യപ്രവർത്തകർ കോവിഡ് 19 തുരത്താൻ വേണ്ടി ആവുന്നതെല്ലാം ചെയ്യുകയാണ്‌.
മനുഷ്യനിൽ നിന്ന്‌ മനുഷ്യനിലേക്ക്‌ വൈറസ്‌ പടരുന്നത്‌ തടയാൻ ബഹുമാനപ്പെട്ട ആരോഗ്യമന്ത്രി #Breakthechain ക്യാംപെയിൻ തുടങ്ങിയ ദിവസമാണിന്ന്‌.
എന്നിട്ട്‌, സഹമത്സരാർത്‌ഥിയുടെ കണ്ണിൽ മുളക്‌ തേച്ചു എന്ന് പറയപ്പെടുന്ന (ബിഗ്‌ ബോസ്‌ അറിയാതെ പോലും കണ്ടിട്ടില്ല, ഇനിയൊട്ട്‌ കാണുകയുമില്ല) ഒരു ഭൂലോക സ്‌ത്രീവിരുദ്ധൻ പുറത്തായതിന്‌ അയാളെ സ്വീകരിക്കാൻ എയർപോർട്ടിൽ ഇജ്ജാതി ആൾക്കൂട്ടം ! ഒരു കാരണവശാലും അനുവദിച്ചു കൂടാത്ത ഒന്ന്‌.
ജീൻസിട്ടാൽ ‘ട്രാൻസ്‌ജെന്റർ കുഞ്ഞ്‌’ ജനിക്കുമെന്നും യൂട്രസ്‌ സ്ലിപ്‌ ആവുമെന്നും പറഞ്ഞ്‌ നടന്ന രജിത്‌ കുമാർ, അമ്മയോ കുഞ്ഞോ നിഷേധികളാകുമ്പോഴാണ്‌ സെറിബ്രൽ പാൽസിയോ ഓട്ടിസമോ ഉള്ള കുഞ്ഞുണ്ടാകുന്നത്‌ എന്ന് വലിയ വായിൽ മൊഴിഞ്ഞിരുന്നൊരാൾ… പൊളിറ്റിക്കൽ ഇൻകറക്‌ട്‌നസിന്‌ കൈയും കാലും മുളച്ചവൻ !
പേരിന്‌ മുന്നിൽ ‘ഡോ.’ എന്ന് വന്നത്‌ പിഎച്ച്‌ഡി ഉള്ളതിനാലാണ്‌ എന്നത്‌ സൗകര്യപൂർവ്വം മൗനം പാലിച്ച്‌ മറച്ച്‌ വെച്ച്‌ ശരീരശാസ്‌ത്രമെന്ന പേരിൽ മനസ്സിലെ വിഷമൊഴിച്ച്‌ ആളുകളെ നശിപ്പിക്കാൻ വെച്ച രജിത്‌ കുമാർ…
എന്നിട്ട്‌, നാട്‌ മഹാമാരിയിൽ പെട്ട്‌ കിടക്കുമ്പോൾ അയാൾക്ക്‌ വേണ്ടി രോഗം വരാൻ സാധ്യതയുള്ള വിധം ആൾക്കൂട്ടം ചേർന്നിരിക്കുന്നു. ആരുമില്ലേ ഇവിടെ ഇതിന്‌ തടയിടാൻ? എന്തൊരു അക്രമമാണിത്‌ !അങ്ങോട്ട്‌ മാറി നിൽക്കണം മനുഷ്യരേ… കോവിഡ് 19 കളിതമാശയല്ല. കൈയീന്ന്‌ പോയാൽ ‘ബിഗ്‌ ബോസ്‌’ അല്ല ‘ബിഗ്‌ ലോസ്‌’ ആയിരിക്കും.ഇപ്പോൾ ഭയമല്ല വേണ്ടത്‌, നിതാന്തമായ ജാഗ്രതയാണ്‌.പിഴച്ചാൽ ഇത് വേരോടെ പിഴുതെടുത്തേക്കും.
അണ്ണനെ ‘ഉയിർ’ എന്ന് വിളിക്കണേൽ ശകലമെങ്കിലും ഉയിര്‌ ബാക്കി വേണമല്ലോ… !
